北海道再度蜜月之旅 -- 始動

美瑛 - 四季彩之丘

去年六月同太太結婚時,
原本計劃去北海道渡蜜月, 可惜由於假期問題,
可以請假既時候, 已經係八月. 過左花卉盛開之期.
結果只有改去東京, 京都, 大阪,
並跟太太訂好, 於今年再去北海道.

今年年初, 原本已經計劃定好,
我倆夫婦二人, 跟太太二哥及其女友,
合共四人一齊租車暢遊北海道,
原本計劃係相當美滿既:
可以由二哥同我輪流渣車,
而太太及二哥女友都懂日文, 此行本應萬無一失!

可惜後來事情有變, 出發前既兩個月左右,
二哥兩人甩底, 我兩公婆即時企左係度……原因係:

1. 我個車牌只係拎左一年, 連埋學車考車既渣車既總時間,
應該唔多過四十個鐘. 莫講話係外地渣車, 係香港都無幾何渣.
太太對我既駕駛技術, 相當有保留.

2. 同東京大阪唔同, 北海道我地二人都未去過.
事前亦大安旨意, 諗住有二哥同佢女友同行,
佢地可以搞掂晒d事前準備, 結果係我地完全無搵過北海道既資料.

3. 臨近旅行之期, 小弟正要轉工,
雜務煩多, 假期方面, 又再糾纏一輪.

基於以上原因,為左唔需要有太大心理負擔及資料搜集,
我們幾乎百分之八十會轉去東京(又係東京!!)行街散心算.

而其實, 我地既心裡面,
都係好渴望有得去北海道自由自在地駕駛, 影相, 食野..….

幾經糾纏, 一天, 老婆忽然同我講:”不如…..都係去北海道啦~”

好! 既然老婆都唔怕, 我又點會怕! 興奮都黎唔切!
即時買package訂機票上網租車book 酒店搵料plan 行程.

我們北海道再度蜜月之旅~ 始動!