北海道再度蜜月之旅(一) : 香港.札幌

七月一日 晴

期待已久既北海道之旅, 今天終於出發了~~

六點幾鐘已經起身, 大概係太興奮吧, 昨晚竟然訓唔著.
咁大個人, 對於有得去玩, 仍然好似小朋友一樣.

帶齊証件行李, 乘機場快線, 八點幾就去到機場
今次係乘國泰直航札幌既cx580.
由於信用咭有得免費參加國泰既 Marco Polo Club
而據聞Marco Polo Club有專用既櫃檯, 又有專用候機室云云.
基於貪小便宜兼想試下係唔係真係有優待,
雖然我們一早已經於網上check-in, 訂好座位.
不過一到機場, 仍然就四圍搵Marco Polo Club既 check-in counter

問明左國泰地勤姐姐, 終於搵到Marco Polo Club 條隊
居然比一般櫃位既人龍仲要長,
原來Marco Polo Club 條人龍,
係同埋business class 及 first class 既人一齊
反而internet check-in counter 一個人都無,
最後, 都係走番去internet check-in counter .....
識得善用internet 既人真幸福~
(善用internet 既好處, 對整個旅程有好大幫助, 往後自有交待.)

去到check-in counter,
俾左張 confirmation 既 print out 俾地勤姐姐.
居然得出一個始料不及既喜訊:
航班爆滿, 我們被upgrade 到business class!!!

嘩~~~哈哈哈哈~~~ 實在太好太幸運了~
從來都無想過, 係 internet check-in 都有機會俾upgrade
我同太太都開心不已,不過都忍住唔敢笑出黎, 免顯得太過大鄉里.
但係實在太興奮, 結果行李過完磅,
唔記得拎passport 同登機証就走開左........
最終都露出馬腳, 俾地勤姐姐發現了~ XD

Check-in 後就即時入閘, 係閘內食過大家樂早餐,
行下duty free, 未幾就登機了.

Business class 除左座位比較寬敞外,
另一特色, 就係不停食, 食, 食......
四個鐘既航程, 幾乎食足兩個半鐘.
當然, 唔算好食, 不過都好過無野做.

三點半左右, 飛機就抵達札幌新千歲機場.
海關櫃位很少, 只有三, 四個. 倒要輪候一段時間.
過左關, 取過行李, 有機場內隨手拿些北海道旅遊資訊
好快就買票登上往市中心既 JR.

四點鐘, JR 抵達到札幌站, 天朗氣清, 心情大佳!
不過天氣比想像中熱, 係香港上網睇, 以為只有十幾度
原來日間有太陽, 都有廿幾度.

JR Tower 外, 天朗氣清~

係JR 札幌站一出, 見有一個counter
寫住"歡迎Kitty Hawk" 什麼什麼的, 有很多旅遊資訊,
我二話不說, 不理有用無用, 又拎左一大堆. 呢個係我去旅行既習慣.
後來發現札幌市內一街都係海軍,
估計Kitty Hawk 應該係外國既一艘軍艦來.

JR Tower, 見到有好多海軍

札幌JR Tower 係一座非常巨型而宏偉既建築,
集商場, 酒店, 車站, 廣場於一身.
係車站廣場外, 時不時有展覽.
我們抵步時, 碰巧就係可口可樂Fun Fair.

可樂 既 Promotion 姐姐同 Kitty Hawk 既海軍哥哥

出左車站, 向右拐走不遠就是我們在札幌的住宿,
札幌京王酒店 (Keio Plaza Hotel Sapporo)
京王都算係日本既大酒店集團, 各地都有分店, 而且地點不俗.
亦因此房租較貴. 去東京就一定唔會住
不過今次去北海道話晒係再度蜜月嘛~ 決定食好d 住好d
搵得黎洗得去, 搵得黎洗得去......

check-in 時先發覺, 原來Kitty Hawk 既海軍都係住係同酒店.
上到房, 以為貴d 既酒店, 房間就會大d, 點知比想像中細.
double room 基本上比起新宿太子酒店大不了多少. 有點失望.
由於只住一晚就離開, 明天即轉往富良野,
放下行李也不張羅. 拎起相機就往外跑.

我們以JR Tower 為起點, 先去左可口可樂 Fun Fair.
Fun Fair 外有樣子甜美既姐姐做招徠.
免費入場, 仲有冰凍可樂贈飲~
Fun Fair 內展示可口可樂歷史, 唔同年代既可樂樽
以及好多可口可樂既精品. 其中搖搖呀, 扭計蛇呀等,
倒也勾起不少童年回憶.

可口可樂搖搖

可口可樂Barbie

離開Fun Fair, 轉往不遠處既 Bic Camera.
Bic Camera 跟 Yodobashi Camera, 就有如日本版既豐澤同百老匯,
由於有好多攝影器材同it 產品, 去親日本都會去好多次.
今次主要係去幫人買Sony T30.
入去check 完價錢, 行左成個鐘,
把玩左一輪一部睇到我地嘩嘩聲, 可以收電視又好有型既vodafone
就慢步前往港台知名既蟹放題 -- 蝦蟹合戰, 食我地既北海道第一餐.

遊札幌其實好易, 因為地點好集中
由JR Tower 出發, 只要一直向南行, 已經會順序經過:
大丸> bic camera > loft > seibu > parco > 大通公園 > 狸小路 > 薄野
由JR Tower 慢步行到薄野, 只係大約半小時. 基本上地下鐵是用不著的了.

經過大通公園同狸小路, 未幾就到薄野.
沿途見到有好多 kitty hawk 既水軍.
薄野比較多夜生活, 不難理解阿兵哥來幹什麼.
而蝦蟹合戰, 就係薄野既一楝大廈頂樓.

蝦蟹合戰樓下既"Ladies Club"廣告牌....... 靚仔到呢...... -.-!!

去門口睇左餐牌, 已經決定要蟹, 壽司, 天婦羅及蒸蛋放題
約 4,000 yen 一位食個半鐘, 當七算, 大既hk$280 吧~
店中有幾位講流利普通話既服務員.
我正讚嘆日本人講國語講得真好
太太就說: 是中國留學生來吧.
我真白痴......

蝦蟹合戰, 名付其實真係同蝦蟹搏鬥
Order 完後, 好快就有三件天婦羅, 三件壽司, 一個蒸蛋, 以及一盤蟹
包括: 一排鱈場蟹腳, 兩隻毛蟹, 以及兩隻松葉蟹!!
另外用網上print 出黎既 coupon, 有兩杯飲品送~

蟹!蟹!蟹!

我本身因為懶, 對於蝦蟹呢類有殼既食物都好少掂,
而呢一餐, 基本上食左我過往三十年食蟹既總和!! 仲首次開原隻既蟹.
好在之前見過老爸點開蟹, 唔係對住幾隻野, 唔識開就真係唔知點算.

不過, 識得開係一回事, 識唔識食就係另一回事,
一向食開啖啖肉既鱈場蟹腳當然不成問題,
不過原隻既毛蟹同松葉蟹就好難搞!
毛蟹同松葉蟹, 蟹味好濃, 又好多膏, 其實比鱈場蟹仲要鮮味.
不過太太同我對於原隻眼望望既蟹, 始終心存芥蒂.
除左大閘蟹之外, 對於冷冰冰既蟹膏,
始終唔太敢食, 總係覺得食完會肚痛.
而最大問題係, 毛蟹同松葉蟹既殼好硬好鬼難剪,
食佢地完全係消耗戰, 真係剪到手都軟.

最初我地死唔蝕抵, 頭十五二十分鐘, 真係野都唔講係咁剪係咁食.
不過後來我地都只係叫多一round 鱈場蟹腳同蒸蛋就完事.
唔食, 唔係因為飽, 而係因為真係剪蟹殼剪到手軟.

北海道日長夜短, 七點幾先開始天黑
回程時天已全黑, 天氣涼了很多, 大概只有十八, 九度左右
食飽左散步回酒店, 途經狸小路, 行下藥房, 睇定d 買手信既地方,
又入左去一間24小時營業既文具店. 好快就番到酒店.

番到房, 安頓好晒,
由於出發前一晚沒有好睡, 諗住早d 訓準備聽日駕駛之旅.
點知隔離房班水兵, 唔知係邊度搵左部 hifi 番黎, 居然係酒店房度開party!!
本來想打去front desk 投訴, 不過諗住只係住一晚,
旅行為開心, 都係算.

結果仍然係無覺好訓,
最終, 係睇埋英格蘭出局先訓得著......