北海道再度蜜月之旅(五) : 小樽.札幌

7月5日　陰

又係早上7時起身, 在酒店食完buffet早餐, 收拾好一切,
check out後便把行李存放在酒站,
兩手fing fing的到小樽各哨子館及 Oregal館行街街.

小樽係一個好細既地方, 以前係一個好重要既外貿港口,
街上有好多歐洲式既古舊建築物, 夾雜住傳統日式既樓房.
見証左昔日美好既時光.

今日有好多中小學生來到小樽修學旅行, 沿途玩orienteering.
小樽賣最出名既, 係佢既玻璃工藝, 其次就係音樂盒同萬花筒.
賣玻璃製品既店鋪叫作"哨子館", 全部的玻璃工藝都很漂亮,
加上店舖的燈光及木建築,人不住的大叫「好靚啊！好靚啊!」

在眾多的哨子館中，我覺得以大正哨子館的東西最精細.
在大正哨子館我們買了一隻彩色玻璃杯,
亦在另一間站鋪買了一個手搖音樂盒作手信.

除了精品以外, 最令人驚喜的就是我們見到一間像市場一樣的小店,
果度有好多即叫即燒的海鮮, 6cm 直徑的帶子都係400 yen 一隻!
仲有300 yen 一件的夕張密瓜!!
店名已經忘記了, 在北一哨子館附近,
於是我地就叫佢做"北一帶子館" ~

食完又甜又大隻既帶子, 就往六花亭同北果堂走,
行到近小樽南站, 就上左JR 去小樽既 Outlet "Wing Bay Otaru"
去果度係為左搵一個一年前係東京見過既餃子形 cushion
可惜去到 Outlet, 不但搵唔到餃子cushion,
個Outlet 仲又舊又無人氣, 好似就執笠咁, 行得兩行就無心機.
唯一既得著, 就係行經Best 電器站時,
太太用隨身既O2 居然偷到無線 wifi 上網!
用O2 上左MSN一陣, 聯絡了親友, 問清楚個手信list 之後,
太太再買埋奇妙家庭變形豆爸爸媽媽茶壺, 就離開了Wing Bay Otaru.
　
我地乘 JR 原路折返小樽南站, 途經又去左多次北一帶子館,
食多一片有病既汐張蜜瓜同帶子, 再去搵地方lunch.

原本諗住尋晚食左政壽司,
今日食間平少少既, 點知原來大多差唔多價錢,
無理由退而求其次, 最後都係去左同政壽司齊名既旭壽司.

我要左一個全海膽飯, 太太要左一個三色飯,
覺得比政壽司既還要好食, 而結論係"食海鮮,都係要食最好!"

食完之後, 行番去酒店附近買音樂盒做手信.
再去December 3 影相(因為太太係 3/12 生日~: ) ,
就去拎番行李坐JR 番札榥.

今次旅程我地由Sapporo Keio Plaza 開始, 亦係去番呢間酒店終結
Check-in 時, 太太 book 左 Twin Room,
我仲以為搞錯左, 點解唔係 Double Room?
後來先知好彩冇傻瓜話要 Double Room,
因為 Twin Room 係我地在日本咁多次以來, 最大既房間
除左有有full bathroom 之外, 仲有一個make up area
房間大到極, 攤開晒D 行李仲得~

札榥, 作為我地最後一個停留既地方,放好晒行李,又試 shopping.
大作戰首站我地以JR 站附近為目標,
去左bic camera 買左部 Sony T30, 及一d 即影即有既用具.
跟手行左去Yodobashi camera 度睇野.
呢兩個幾乎係我地每次去日本必去既地方,
有如香港既豐澤同百老匯一樣.
跟住去左行大丸, Comme Ca, Uniqlo......
行到腳軟, 就係 Stella Dinning Place 搵野食
見到係大阪食過既鶴橋風月好味燒, 於是再食一次.
不過今次既哥哥整既手勢無上次大阪既姐姐咁好.
去食飯時已近九點, 食完又係時候番左去酒店訓覺.

北海道再度蜜月之旅(四) : 美瑛. 札幌. 小樽

七月四日 晴

根據前幾日既經驗,
昨晚睡前已懂得先拉好窗簾.
所以今日無被陽光喚醒, 訓晏左少少.
由於安排左七點鐘食早餐,
梳洗就顯得有點趕忙.

太太梳洗化妝需時
獨個兒先走到樓下既飯廳.
昨晚抵達時已入夜, 未有參觀漆藝館.
早上再睇, 四週既環境好靚,
兩層高既木建築, 外邊有一大個花園.
主館內陳設不少館主既漆藝傑作.

漆藝館

進入別館地下飯廳, 好幽雅既環境!
室內有一個開放式既廚房,
兩張天然巨木做既長餐檯.
靠牆的都是放滿了擺藝術書籍既書架.
全部都係木製家具, 落地玻璃窗對住室外園景
陽光滲入屋內, 感覺好舒服.

早餐有和食及洋食選擇,
我們對於和式早餐還是有點不憤,
所以昨夜選定了要洋食.
坐定後, 管理員小姐就端來好豐富既英式早餐.
有沙律, 炒蛋, 仲有一大舊熱烘烘既麵飽~
唔少得既, 就係隨精緻餐具奉上既咖啡及茶.
如此幽雅環境, 如此豐富既食物. 如此高質素既住宿.
如果住左新式酒店, 就無緣體驗了~
塞翁失馬, 焉知非福?

美味早餐~

由於昨日逗留係花田既時間多左,
原本有好些安排在昨天遊覽既美瑛景點還未去.
加上之前唔知搞咩, 原本可以最遲晚上10:00 還車既
手多多book 左5:00 就要番到札幌.
就算以收費高速公路計, 車程亦要兩個小時,
即係我們最遲下午2:00 就要離開美瑛.
令到今日Patchwork 之路 同 Panorama 之路既行程有點趕.

吃過早餐, 在園內拍過照片, 就匆匆離開漆藝館.
由於昨日曾先後誤闖Patchwork 之路 同 Panorama 之路
對於方向已有大概既認知.
不過為免重蹈覆轍, 我地都係先去四季情報館,
拎晒地圖, 問清楚路線之後, 方始起行.

兩條路線中, 我們選擇先去 Panorama 之路.
Panorama 之路以一連串出名既樹木組成.
叫得Panorama, 就係一望無際~
極目望去, 都係遼闊既稻田草地.
美景俯拾皆是, 看得人心曠神怡.

我們由昨天經過的Ken and Mary 之木作第一站,
再入Seven Star 之木, 親子之木,
再去Mild Seven 之丘作結.

KEN AND MARY 之木

SEVEN STAR 之木

SEVEN STAR 之木

親子之木

小樹

在Panorama 之路, 大概各處景點都差不多:
都係一棵或一排樹, 加藍天, 加青草地,
偶爾加一間顏色鮮艷而孤獨既小屋.
對於一般遊客來說, 只會每地逗留十分鐘.
不過對於喜歡攝影既人來說.
看見如此景色, 絕對會發狂.
我們在Panorama 之路拍完又拍,
結果要三小時才走完.

跑完了Panorama 之路, 就轉入 Patchwork 之路.
Patchwork 之路既特色係縱橫交錯既稻田草坪.
猶如一塊由唔同布碎拼湊起來的花布.

沿途見有一大批人,
騎單車上斜遊Patchwork 之路, 好不辛苦!!!
由於之前一日曬得太厲害,
莫講話在烈日當空之下騎單車上斜路
就算身在開盡冷氣的車廂裡,
太陽照在緊握方向盤的手, 仍是赤痛非常,
最終要穿上長袖衣服, 隔絕陽光方可.
換上要騎單車的, 大概會要了我的命...

我們以三愛之丘的cafe 做起點.
三愛茶屋其實是一間很小很小的咖啡店.
只有吧檯位, 大概容得下五六個人吧.
內裡兼售很多精品, 飾物, postcard 等.
我們食左一個好好食既雪糕加熱mocha~
稍事休息, 又再出發.

Patchwork 之路其實無特定景點,
基本上沿途都風景秀麗,
地標則有拓真館.美馬牛小學及紅色童話小屋.
我們駕車往拓真館方向走,
只要看到適合拍景的地方, 就會把車停下,
大拍特拍一輪, 才又上車離開, 自由自在得很~

拓真館係已故既北海道名攝影師前田真三既展覽紀念館.
內裡有好多拍得很精彩既富良野美瑛照片.
我們當然不會錯過~

拓真館並無公眾停車場,
要把車子停在前一點的一個交易所再行去.
我們在拓真館內逗留了約半小時,
買了一本小小的前田真三寫真集, 就繼續旅程.

沿途行行停停的,
去了前田真三最愛拍的美馬牛小學,
近看的美馬牛, 只是一所很平凡的校舍,
大概要從遠方高處, 才看到他那小尖塔鐘樓的美.
之後再到遊人拍友必到既紅色童話小屋.
很趕忙連拍多張照片, 就要離開了.

一如所料, 我們共花了五小時遊完了兩條路.
準備開始返回扎榥.

回程之時, 經過四季彩之丘,
本來見時間太趕, 想唔入去.
反正之前一日已去過三個花田.
後來見唔收錢, 只係希望大家每人捐200yen,
咁就入去同 Roll 君影張到此一遊.

入到去之後, 發現好彩冇錯過呢個地方,
因為雖然薰衣草都係未開,
但係果度係有一大個太陽花花園.
同埋係適當的地方, 總有一棵樹,
方便大家影相構圖用.
結果又係一面講:"好喇好喇~走喇走喇~" 但又一面唔停手咁影.
最後又逗留左個幾鐘先捨得走.

由於實在花左太多時間係遊覽,
為左趕及交車既時限
回程無得選擇, 只有行收費高速公路

由美瑛經旭川落札榥, 中途行左好多條 highway,
比起之前行山路, highway 真係好悶.
路程總共約170 km, 時速限制係80 km,
不過其中大約150km 我地係以時速120-140km 行走~
其實有不少車都同我地一樣行到咁快.

在出highway 後, 汽油只餘下兩小格半,
去附近油站講句"hai, man dan de su.",
入滿左油, 就駛番去 mazda rent-a-car.
下午4:45 抵達, 全程需時3小時.

接著我地碌住ｄ行李去到JR 站搭JR 去小樽,
這次乘的是區間快速, 需時大約40分鐘左右.
之前幾日有車, 唔駛碌行李上上落落,
家下無車就覺得好唔方便了~

係小樽住既係 Authent Hotel,
酒店的人的英文不錯, 可以以全英文溝通.
入到房間, 第一件事係要快叉相機的電.
經過早前係Panorama 之路, Patchwork 之路以及四季彩之丘狂影,
兩部DSLR 都冇晒電.
為左要影小樽運河既 Magic hour
幫其中一部機快叉左15分鐘後,
6:45 就起行到小樽運河.

由酒店去小樽運河, 只要約十分鐘路程.
到達運河, 已經有好幾個人set 好左腳架等影相.
我地由天光等到日落再影埋夜景, 前前後後又影左兩個鐘.
這兩小時當中, 我地遇到一位好好人的日本叔叔,
佢係成日來小樽影相, 又教埋我地點構圖, 又帶左小樽的相比我地睇.
最後仲好好人仲送左一張小樽既大相比我地.

影相期間, 我聽見後面有把國語女聲講:"構什麼圖丫, 構來構去還不是一樣~"
回頭一望, 原來係早前係日之出公園的台灣夫婦與小朋友,
於是又幫佢地影左一張相.

不經不覺就影到9點, 已經好肚餓,
見到運河對面的政壽司分店環境唔錯,
Menu又好吸引,於是入去食.

係政壽司我地選擇左坐sushi bar, 睇住師傅整壽司
我地叫左兩款 recommended course,
有幾好食呢..... 好難形容, 總之D 食材好新鮮,
連唔食魚子既我, 都覺得D 魚子又新鮮又甘甜
所以, 都係睇相.

食完, 就先沿運河散步, 至盡頭.
再往北一哨子館方向走.
最後去左lawson 買左d 飲品就番左酒店.

北海道再度蜜月之旅(三) : 富良野. 美瑛

七月三日 晴

昨天晚上忘了放下窗簾,
今天一大清早, 又給太陽伯伯喚醒了.
起床時只係早上既五點鐘, 太太仍在夢中.
由於昨晚早睡, 今早精神抖擻
獨個兒拎起相機往外拍照.

在民宿外, 又見到昨日四男女中既主事人 Ringo,
原來大家都係拍友, 同樣係一早拎起相機四圍影.
對於今晨未有早起身去日之出公園睇日出, 均感可惜.

上富良野?.

待得太太醒來, 收拾好行李上車, 只係早上六時.
距離早餐尚有一小時. 於是驅車前往上富良野JR站附近既7-11,
買左雜誌飲品小食, 以及一個季節限定既藍莓 Hagendaz 雪糕.
然後係上富良野JR站前既Noroko號木雕前留影.

Noroco 火車

Noroko 號係夏季既特別班火車,
專門在花開季節, 帶遊客穿梭各個花田.
由於今次我們係自駕遊, 無緣乘坐.
只有在木雕拍照留念.

返回Cosmos Farm, 剛好七點.
在飯廳就坐, Shibata 太太就奉上早餐,
有炒蛋, 厚多士, 野菜沙律, 以及半支超超超超甜既粟米.
我們都懷疑那支粟米是否有病... 怎會那麼甜!
而炒蛋更加係是次北海道之旅中, 炒得最好既.
不知是否加入了牛奶, 日本的炒蛋,
總係炒到稀巴爛的鬼五馬六. 實在應該向麥當奴學習一下.

超超超甜粟米.

食完早餐, 付過房租後就離開 Cosmos Farm
臨走時同仍在食早餐既四人組道別.
對於我地兩公婆為左黎北海道影相,
拎左兩部數碼單反, 一部菲林機,
五支鏡, 一腳架, 以及一台手提電腦,
大家都表示非常之不可思議......
(後來更加入了一部數碼相機, 合共四台機~:p)

又再出發啦

由於事前已將GPS set 好, 今早行程就順暢得多~
基於開放既時間次序緣故,
最近既flower land 開得比教遠既彩香之里遲.
因此, 我們捨最近既Flower Land 而先取道往彩香之里.

終於可以現場見到淚目

早上7:30 到達彩香之里,
一見到門口既淚目, 已經興奮不已.

勤勞的農夫

彩香之里在一個小山丘上,
猶如一個大公園一樣. 免費入場.
由於時間尚早, 非常之少人,
此際頭上一片晴空, 極目望去係一大片花田.
大藍大綠的, 令人心情舒暢.
園內既薰衣草雖然未全開, 不過已有小花.
開花情況比起日之出公園好多了.

藍天白雲係薰衣草的指的背景

由於冇咩人，可以影好多薰衣草大頭照

薰衣草有分早期開花同後期開花.
早期開花顏色較濃, 後期開花味道較香.
由於薰衣草尚未全開, 未能親自收割採集
我們於場外既小商店內,
分別買了一扎早期開花同一扎後期開花既薰衣草乾花,
一來做拍照道具, 二來帶回香港放入衣櫃, 有除蟲辟臭之用.
後來我們才發現, 原來各個花田中,
以彩香之里最無商業味, 薰衣草乾花最大扎抵買~

彩香之里的薰衣草田

在彩香之里內瘋狂拍照, 影左成兩個幾鐘,
之後才往北海道最出名既富田農場進發.

富田農場與彩香之里, 係兩個截然不同既世界.
彩香之里比較恬淡, 富田側充滿左商業味道.
抵達既時候, 入口停車場已泊滿了旅行團的旅遊巴士.

富田農場入口

農場入口有許多小花圃, 小商店,
有賣雪糕的, 賣麵包的, 賣蜜瓜的, 仲有產地直送~
我們先買左一個薰衣草味和一個蜜瓜味雪糕,
很奇怪, 一向唔喜歡怪味食品既我,
居然覺得薰衣草味比蜜瓜味好吃.

薰衣草雪糕 旅遊書話似?所香精味~

蜜瓜雪糕 太太好鍾意

之後, 我仲買左一個新鮮熱辣既蜜瓜包
所謂蜜瓜包, 說穿了其實只係蜜瓜味既菠蘿包.
味道一般, 不過表皮幾鬆化~

蜜瓜麵飽工房

富田農場一樣免費入場,
由於出名, 加上商店多,
幾乎係北海道旅行團必到景點.
花的確係較多, 薰衣草開得較盛, 不過人亦多,
就反而無彩香之里咁好行, 拍照亦難.
再加上一大早就曝露係日光之下
不知不覺間已有點曬傷. 雙臂後頸辣乎乎的,
怪不舒服. 好多時都懶得舉機.

富田的薰衣草田

在富田農場跑了一個圈,
參觀了內裡的香水製造工場.
我和太太都又熱又累.
於是又去飲食, 補充體力~
太太飲左一個好好味既士多啤梨牛奶,
而好奶製品既我就食左個牛奶布甸.

坐低休息左一陣, 行去著名既彩虹花田
可惜因為花未開, 彩虹甩左色......
最後只是拍了幾張到此一遊照,
再跑去買了一包薰衣草培植套裝,
就離開了富田農場. 往紅酒工房食lunch 去.

Furano Wine House

紅酒工房係太太指定要去既地方,
唔係因為果度有d 咩野咁值得睇,
亦唔係因為我地鐘意飲酒, 其實都係因為食.
據講紅酒工房既餐廳, 入面既芝士火窩相當出色.
故此成為指定景點.

紅酒工房餐廳係一個小山丘上,
可以望見整個富良野市.
我地去果日係星期一,
睇旅遊書, 一本話會休息, 一本話會營業,
我地去時, 都係諗住搏一搏.
果然營業時間已經改左, 餐廳如常營業.

我們叫左一客細既芝士火窩, 一個海鮮意大利粉
另外有一個唔知點解會送既salad bar. 仲有一杯葡萄汁~
火窩唔錯, 芝士夠香濃, 不過真係細左d.

南瓜場加沙津

Petit Fondue 芝士味香濃

反而個意大利粉就好好食, 意粉外軟中韌有咬口,
做法頗為正宗, 而且加入不知名香料. 非常好食.
葡萄汁亦非常好喝~

無咩料但好好味的意粉

埋單4000 yen 左右, 合$280.
以食物質量計就稍稍貴左少少,
不過環境一流, 坐得舒服. 抵番~

由於我要渣車, 無得入紅酒工房試飲,
而剛才果杯葡萄汁又非常好味, 於是改去果汁工房.

果汁工房離紅酒工房不遠, 只5分鐘車程.
未去既時候以為工房好大,
原來只係一座兩層高既建築物.
而且全無人氣, 生產線又無開, 試飲又飲晒.
只有一個愛理不理既女職員看守小賣部.
後來有幾位日本阿伯黎到, 要求女職員提供試飲.
之後就叫埋我地去拎, 我地先至有得試.
最後, 我地買左一紅一白既葡萄jelly,
我們都覺得白葡萄jelly 太淡, 都係紅色好味d.

紅白葡萄jelly.

離開果汁工房已經係下午三時,
接著就開車往 Flower Land 進發.

Flower Land 係一個要俾錢入場既花田, 每位 500 yen,
兩個人就要 $70, 原本覺得有d 貴.
當俾錢時, 姐姐就話俾我地知,
原來外地遊客平一半! 即時抵晒~

Flower Land 的薰衣草

同之前既彩香之里一樣,
Flower Land 都係係一個山丘之上.
不過當中既精彩程度就嚴重好多倍! 要俾錢既係唔同d!
各式多姿多彩既花, 係十勝山峰既襯托之下.
又係謀殺不少菲林 (其實係memory card 至真...)
影到連我部1d2n 都無晒電.

可趣緻的草波波

靚到嘩嘩聲的菜油花海同十勝山峰

係 Flower Land 影左好多同一背景,
但唔同角度, 唔同構圖, 唔同顏色既花既相.
影到我同太太都覺得唔多對路.
去到後來, 彼此都話:"好喇~ 走喇~ 走喇~"
口中係咁講, 但手中仍不放下相機,
繼續構圖對焦.....

Flower Land 的 Poppy

Poppy 與十勝山峰

再咁影都唔係辦法.
加上仲要渣大半小時車去美瑛.
係Flower Land 逗留左成兩個幾三個鐘,
不捨地離開~

富良野同上富良野既景點行程已經完成,
之後就渣車去美瑛.

一如以往, 我地先去美瑛JR站落腳.
美瑛既市容好靚好乾淨, 成條街都係好精緻既小屋.

係美瑛原本我地係訂左新開係JR店隔鄰既新酒店ホテルラヴニ?ル美瑛.
房租又平, 設施又好, 地點又方便.
可惜係我地臨出發前兩日, 當我核對住宿之時
先發現我地book 錯左日子!
Cosmo Farm 同新酒店都係book 左 7月2日.....
好在新酒店係mytrip.co.jp 度訂
入住之前兩日都可以無償網上cancel.
結果我地臨急臨忙先book 番而家呢間美瑛漆藝館.

漆藝館網上既地圖好簡單, 而且我又唔記得抄低電話.
結果係美瑛兜左好耐都搵唔到佢係邊.
先誤入 Patchwork 之路, 走左去 Ken and Mary 之木
後來又誤入 Panaromic 之路, 幾乎去左三愛之丘...
搵左成個鐘, 最後都放棄,
走番去美瑛JR站既施客中心 -- 四季情報館問路, 先知係邊.

花左一大段時間, 去到漆藝館, 己經成7:00
可喜既係, 漆藝館比想像中靚好多, 而且有型.
佢主人本身係一個漆藝藝術家.
本館係名付其實既漆藝館.
而別館就係客房同餐廳.

漆藝館　當時去到已經天黑，呢張係第二朝影

別館只有三間雙人房,
主要係接待外來欣賞館主漆藝既同好.
可能因為主人都係有品味之人
房間相當精緻, 格調亦高.
完全係一間高級酒店房間無異.

安頓好後, 剛巧係日落時份.
結果又拎起相機, 出左去稻田中影magic hour 去~

漆藝館無包晚餐, 只有駕車去美瑛市內搵野食.
可惜一過六點, 市內幾乎所有鋪頭已經關門.
諗住走去酒店ホテルラヴニ?ル美瑛度,
住唔到都可以食個飯嘛.
點知都係關門, 而且酒店內部,
似醫院/宿舍多於酒店, 冷冰冰的.
心中暗自興幸錯有錯著, 漆藝館比佢好多了~

由於早上曬左太耐, 個人已經好倦,
無咩心情再兜來兜去, 最後決定去 7-11 解決.
我買左個即食咖喱, 白飯, 以及一個冷麵,
太太就要左個杯麵加個即食黑豬火腿.
一於番漆藝館煮大餐.

食完飯, 用手提電腦save 起d相, 幫相機叉電後,
大家已經好眼訓, 人都要叉一叉電, 於是好快就訓左.

北海道再度蜜月之旅(二) : 札幌.富良野

七月二日 晴

一早醒來, 天已大亮, 我以為已經係九點幾鐘.
睇下錶先知, 原來只係早上五點幾!
因為日長夜短既緣故, 北海道四點就天光.
監硬迫自己訓多一陣, 七點鐘就起身收拾細軟.
由於昨晚既酒店係額外book 既, 沒有包早餐.
故此check out 左之後, 拖住行李走去附近lawson 買早餐.

租車既鋪頭係JR Tower 既北面, 由酒店行去大概十分鐘.
租車係日本原來幾普遍, 分別可以去原廠租同去幫代理租.
其中代理租車公司好多時有優惠package,
不過就無得指定既型號, 如要指定某隻車款就會貴d.
當中以萬事得同日產較平, Honda 同 Toyota 較貴.
另外亦以cc 黎分唔同等級, 馬力越大越貴.
一般旅行用 1300cc-1500cc 最合適化算.
而GPS 係免費既, 不過租車時要早講.

今次我地自己係網上租左架 1500cc 既Mazda.
開頭想租架 1300cc 既Honda Jazz(即係日本既 Fit),
因為係香港練習時都係用佢.
不過上網比較過Honda 同 Mazda 既 package,
Mazda 既 package 平好多,
一架 1500cc 既租三日兩夜都只係 17000 yen.
合約 HK$1100 左右, 比起 Honda 平成 10000 yen.
咁當然捨車款取大馬力囉~

去到鋪頭,租車姐姐對過車牌, 用credit card 俾左錢.
跟手就俾一大堆既保險需知同車身紀錄我, 然後就去外面取車.
網上預約時,以揭背式既 Demio 為標準車款,
並指定要 Non-smoking car,
取車時方知佢派左架Axela (即係 Mazda 3)俾我, 仲型~

Mazda Axela, 幾有型, 又夠力.

姐姐交低左車匙, 示範左點用GPS,
再幫我地set 好左第一站係去富良野JR站就離開.

Axela 並唔係揭背式, 車尾箱較細,
兩個大行李箱要搞左一輪已掂, 不怎麼好放.
放好行李時, 已有另外幾個香港年青男女來取一架七人車.
可見Mazda 既 package 都幾受歡迎.

一切安頓好, 坐上司機位, 深呼吸一下,
扣好安全帶, 搞下d 鏡, 撻匙, 入波, 放手制, 踩油~
就咁開始左我地既自由駕駛之旅!

「熊出沒注意!!」

仲有「鹿出沒注意!!」

日本既GPS 實在係一個相當完善既系統.
除左帶你到目的地之外, 仲可以俾幾個唔同既路線你揀.
例如最快既路, 最短既路, 唔駛錢既路... 等等
今次我地要左條唔駛錢既路, 距離長d, 要渣三個鐘.

GPS 3D 畫面, 亦有2D 畫面俾你揀.

由於唔係行俾錢既IC 高速公路, 所行既係多灣多分支既山路,
路上既車唔多, 不過就有對頭車, 又要入d 好黑既隧道. 相當刺激.
期間都有幾次轉錯灣, 不過GPS 好快就修正番.

似唔似Ridge Racer 賽道?

我地大約九點鐘開車, 十二點十幾分就安全地到左富良野JR站.
係車站外泊好車, 去左旁邊既 Information Center.
拎左d 富良野既地圖後, 第一件事, 就係去搵食.

三個鐘車程後, 終於到富良野喇!

富良野既第一餐, 我地決定去旅遊書介紹既"唯我獨尊"
個店名就好古怪下, 其實係食日式咖哩同自製香腸既小店.
地點都幾難搵, 係周圍行左一個圈都唔見.
最後去左一個攝影器材店問路先知,
原來先前經過一間門口泊滿晒車, 我地以為係爛地車房既小木屋,
就係唯我獨尊......

店外人龍

呢間小店, 係今次北海道之旅中,
少有既一間食店係需要排隊等位既.
店內狹小固然係原因之一, 而佢亦實在有不少捧場客.
大廚就係老闆, 係開放式廚房內煮咖哩.
另有四, 五位年輕人幫佢手.

包頭既鬍鬚老闆

店內播放著七, 八十年代既英文歌,
燈光昏黃浪漫, 咖哩香氣四溢,
加上小木屋本身柔和而溫暖既格局,
感覺非常relax~

我們都點了店內最有名既自家製肉腸咖哩飯.
賣相已經非常討好~ 咖哩夠濃夠香.
肉腸有點咸, 一定要拌飯吃~
我把自己的一碟吃完, 連太太吃不下的也幹掉了~ XD

一流既自家製香腸咖哩飯~

食飽之後, 在車上花了很多時間用GPS搵下一個目的地: 果醬工房.
太太係GPS 上用盡方法也找不出其正確位置.
而我呢, 一向相信路在口邊, 畢竟人腦最可靠.
二話不說就落車去 information center 問路.
再用人肉GPS: 自己一路睇地圖認路, 一路往麓山方向駛去.

果醬工房離富良野JR站頗遠, 駕車需時三十分鐘.
沿途未見任何公共交通工具(其實齊個富良野美瑛行程都唔見有...)
如果唔渣車, 更加唔知點去.

果醬工房

在果醬工房旁邊, 就係麵包超人館.
館外有人扮既麵包超人同小朋友影相.
仲有好多麵包超人既石像.我地對麵包超人認識不多, 只知有卡通片.

麵包超人館

黎到先知原來麵包超人既作者,
本身係一個相當出色既兒童插畫家.
插畫版既麵包超人, 比卡通片版好看多了~

麵包超人伙伴石像

地下石版都有麵包超人樣

係麵包超人館打左個圈, 之後就入左去果醬工房.
放有多種唔同既新鮮果醬及麵包小塊, 任人試食.
我一向不嗜甜, 不過太太就好興奮, 不斷試食各款果醬.
最後買左幾樽鮮果醬, 以及一個牛奶布丁及藍莓芝士撻上車食.

富良野出名的HISCUP果醬,不過我覺得味道一般,都係一個「甜」字

北海道出名牛奶製品, 牛奶布丁又香又滑就不在話下.
果個藍莓芝士撻先係極品!
唔太甜, 有奶香, 加上淡淡藍莓味, 加上濃郁既芝士口感.
簡直係人間美味!! 我唔太食甜品既都讚不絕口.

由果醬工房往山上走, 就係麓山展望台.
展望台係其中一個因為"來自北之國"呢套日本電視劇集而出名既旅遊景點.
幾乎每一本北海道旅遊書, 黎到富良野部份,
都會介紹呢套做左廿幾年既電視長劇中既場景, 景點.
一套劇做成廿幾年! 真係匪夷所思.

展望台上放眼望去
以山巒為背景, 極目無際既田野, 深淺縱橫既綠,
一排掛整齊畢直既大樹, 以及盛開既鼠尾草.
縱然我地未睇過呢套日本長劇.
但首次接觸北海道自然風光既壯麗魅力,
亦俾展望台既景色深深吸引.

今晚我地會住係上富良野既民宿: Cosmos Farm.
由於之前搵路, 浪費左唔少時間. 去完展望台已經四點幾.
原先係網上訂房安排左三點鐘 check-in.
只好打電話俾民宿果邊話佢知會六點左右先到.

由展望台去上富良野, GPS 話需時半小時.
到達上富良野, 見仲有時間, 就去埋日之出公園.
日之出公園出名既係滿山既薰衣草, 以及幸福拱門大鐘.
薰衣草盛放之時, 好多人係日之出公園舉行婚禮. 非常浪漫.

太太初登場~XDDD

其實係出發之前, 已經知道北海道遲左回暖.
花期遲左, 薰衣草尚未盛放.
不過心中總有一絲盼望, 希望佢地會快高長大.
但當係日之出公園,
首次見到仍然只係一丁點兒既紫色小毛頭既薰衣草之時,
難免有點兒失望...只有幻想滿山都係濃紫時既震撼情景.

嗯...大家用少少幻想力, 想像一下後面滿山都係濃紫色...

雖然花未盛放, 我地係公園度都影左好耐相.
遇見一家三口既台灣人, 幫佢地手影相之後,
行多一陣就駕車點去上富良野JR 站,
等 Cosmos Farm 既主人 Shibata 太太來接.

上富良野站!

係車站打左電話俾 Shibata 太太
五分鐘後, Shibata 太太就渣架七人車來帶路.
好快就到左今次旅程既首間民宿.

精美既 Cosmo Farm

Cosmos Farm 係一間好精緻既小屋,
屋外有一個好大既草地花園
樓下係飯廳, 包早晚兩餐,
樓上有四間雙人客房,
床舖非常乾淨舒服, 十分討好.
唯一既小問題, 就係無獨立浴廁.

Cosmo Farm 既大草地花園

抵步後太太隨 Shibata太太入內check in,
我就泊車同拎行李.
同一時間, 有另一架七人van 泊在我車旁,
原來就係當日同係札幌租車店見到既四個港男港女
佢地係先遊札幌, 再遊富良野美瑛.
而我地既行程就剛剛相反. 咁都撞得到, 算係相當有緣~

上房稍稍安頓好, 就落樓下準備食晚餐.
晚餐係Shibata太太親手煮既
食品豐富新鮮美味, 有蕃茄湯, 蔬菜頭盤, 焗魚,
白汁雞件, 白飯任添, 甜品仲有好甜好好味既蜜瓜!

蕃茄湯同精緻既蔬菜頭盤

白汁雞件

雖然唔係夕張產, 一樣好甜好好味既北海道蜜瓜

食完飯, 問定Shibata太太聽日幾點開始早餐,
為免同人爭, 就先去沖涼, 再回房計劃一下行程.
係房商量好聽日去邊幾個景點後,
就落去車度, 用 GPS set 好目的地.
以免好似今日咁花太多時間係GPS 既操作上.

搞掂好晒, 太太忽然想去 7-11 買雜誌,
難得有車渣, 決定就渣車出番去上富良野JR站買野.
富良野街燈唔多, 入夜就相當之黑,
雖然路程只係五分鐘. 不過黑媽媽, 都有D 驚險.
最抵死既係, 渣到出去, 先發現兩條友都無帶錢...... -.-!
結果原途折番. 混吉到暈.

番到房, 基於兩日失眠, 加上難得遇上溫柔既床舖.
今日好早就訓左 zzzzzz~~~~~