北海道再度蜜月之旅(八) : 札幌, 香港

７月 8日　陰天

北海道之旅最後一日, 一早起左身,
上左去酒店頂樓食定食早餐.

由於唔想拉住幾袋行李去JR 站又上又落,
於是決定坐巴士去機場, 需時個半鐘左右
十點半就要上車.

時間尚早, 走左出左去睇下有冇商店仲開
原來Yodobashi 9:30 就開門, 不過再行都係無野買.
走時, 去左Lawson 度, 買左支大大支既益力多,
之後就番酒店check out

上左巴士, 同車有一港人家庭,
巴士係市中心兜來兜去, 好快又開始訓覺.

一覺醒來, 已經去左機場附近
原本安排好係機場買完蟹就先去 check in
放低行李就去行Outlet 行下.
點知原來check in counter 要上機前兩小時先開!
好在機場入面個商場好多野賣, 可以消磨好耐都得.

係機場買完蟹仔, 無野做慢慢行,
又去左食lunch, 今次仲係食海產類
樣就幾好, 不過味道當然遠遠不及小樽

食完就差唔多時間去 check in,
記得二哥叫我地 check in 完之後千其唔好入閘,
因為閘內無野行, 於是我地又兩手fing fing 去行商場
仲俾我地見番之前係果醬工房時食既 tart!!!
即時買左兩個食, 而我亦買左支北海道牛奶飲

差唔多夠鐘, 我地就入去等,
原來架機唔full 我地兩人都可以坐三個人位.
順利完成今次旅程~

北海道再度蜜月之旅(七) : 札幌

７月 7日　陰天

行程既尾二一天, 準備全程衝刺買野.

今日晏左起身, 早餐食buffet,
不過食物一般, 由其是d 炒蛋,
總係炒到鬼五馬六
早餐食物實在太不濟, 聽日都係食番定食早餐好.

餘下未行既地方, 都係一d shopping mall,
例如 Stella place, 大丸, Parco, Loft
一早起身最好就係去無咩人既 Stella Place,
都係行下 Comme ca 等地,
太太又係買耳環, 戒指, Agnes b 袋, 銀包…… 等.

買完晒野, 下一步就係幫人買 Harrods 既限定北海道薰衣草袋.
原以為係大丸有得賣, 原來係三越至真.
於是又搭左一程地鐵去大通公園附近
可惜個袋一早已經賣晒,
反而係三越見到係東京有開店既日用品店 Afternoon Tea,
又買左d 家居用品.

之後走番上地面搵地方食晏,
原本諗住夜晚食多餐蟹宴黎 farewell,
老婆忽然心血來潮, 諗到lunch 可能有d平d 既 lunch set,
於是走左去蟹將軍度望下. 嘩~ 原來真係有!!
而且平d, 約二百蚊一位, 即入~

食完, 捧住個肚, 慢步行左去二條市場, 叫做到此一遊.
其實好鬼似油麻地果欄加鯉魚門混合體

之後順路行左去札幌電視塔,
由於又係要入場費, 對於登高望遠既興趣唔大.
而且更氣唔多好, 所以都係唔俾.

係樓下chop 左兩個觀光印就走人
再係塔附近買左條夏天先有既燒粟米,
都幾好食, 不過好似白烚既仲甜.

一路食, 一路行埋去最後既一個景點時計台,
都係留影就算, 一樣無入去(似乎我地真係有別於一般遊人…)

係時計台離開, 就行番去車站附近
我要幫人買 Polaroid 相機, 而老婆就想行Loft 同 Seibu
於是又利用walkie talkie 之便, 分道揚鏢
原來個walkie 都幾厲害, 隔左幾條街既樓入面都收到, 好方便下.

之後, 行番去 Loft 同老婆集合.
買完晒野, 先番酒店放低左d 戰利品, 再出去食野.
今次旅程餐餐都好野, 見野就食.
最後一晚食得慳d, 走左去食地下街既咖哩飯, 好鬼平~
呢間叫Little Spoon 既連鎖咖哩飯店,
一如其他日本快餐, 係先去自動購票機購票,
然後坐埋位就有人送上食物.
咖哩仲有分獅子級, 兔仔級, 大象級等....
兔仔係小辣, 獅子大辣, 好有趣~

我保守D, 要左個咖哩豬扒飯,
而太太就要左個湯咖哩雞脾飯
雖然係平, 不過一樣好食,
又見好多日本人只係就咁食咖哩飯,
無咩送既, 所以仍然算豪

番酒店, 終於到左行程既尾聲,
將行理重新整理好, pack 好晒d野
驚覺原來無咩買野, 心下甚歡.
再拎d 野出黎玩左一陣, 就訓覺去

北海道再度蜜月之旅(六) : 札幌

７月６日　微雨

昨晚起身睇左最後十五分鐘既法國對葡萄牙,
可恨葡萄牙輸左．．．

一早起身，就去左食早餐, 早餐有buffet 同定食揀.
由於我地有三次早餐機會, 今日揀左定食, 都唔錯.

今日既行程係地鐵遊, 我地買左兩張 800 yen 既地鐵One Day Pass.
我地決定先去位置較遠既白之戀人工場.

係北海道咁多日, 今日終於有微雨,
慶幸當日無為左遷就花期而改行程.

白之戀人工場, 其實話遠又唔係好遠, 只係十五分鐘地鐵再行幾分鐘就到.
工場相當之靚, 成個主題公園一樣, 有好多機動既音樂公仔.
就好似聖誕節時海港城外邊果D一樣.
去到工場先知, 原來除左外面個公園係免費之外,
工場內係要入場費, 成600 yen 一位.
即係等如２塊夕張蜜瓜同一舊半帶子既價錢.
(自小樽開始, 我地用左蜜瓜同帶子做我地既衡量平貴既單位)
我地都好猶疑入唔入去好... 因為我地唔太喜歡食白之戀人朱古力,
佢地點整又同我無咩關係, 終是決定係地面行下先.

行到去賣野既鋪頭入面, 發現有好多人係度食野,
原來地下既鋪頭仲有一個 cake shop.
入面既 cake buffet 只係每位1200 yen,
比起入去工場齋睇同試食, 倒不如狂食cake 仲化算~
於是又入去，90 分鐘任食各式蛋糕甜品, 好味到暈!
絕對比白之戀人好食. 其中 Mousse 類又比 cake 類好.
除左cake, 仲有北海道有名既車梨子,
雖然唔係最高級既品種, 不過既然係任食既, 可以將就一下.
食完buffet, 先經飽到行唔郁, 加上一早食太多甜野, 好眼訓....

離開左白之戀人工場之後, 我地就去左Sapporo Factory,
其實又係一個shopping mall 來.

由於雨勢開始大. 我地先去 100yen 店買左兩把遮.
付款時發現商場剛巧又有優惠, 買滿 5000 yen 就有贈品,
包括兔仔扇，兔仔memo pad, 兔仔mouse pad等.
我地去買完少少禮物同日用品，已經過左5000 yen.
不過去到 CS counter 時, 先發現貼左告示話當日贈品換晒.
正感失望之際, 我就面朦朦扮唔知問 CS 姐姐係唔係有贈品,
姐姐見我地真係買夠 5000 yen,
又見我地係遊客, 就拎左一套禮物出黎比我地喇~

係sapporo factory 旁邊, 就係sapporo 啤酒廠,
入面其實無咩野睇既, 例影幾張就走人.

由於買左 One Day Pass, 搭多幾次地鐵抵D~
所以先坐地鐵回酒店放低戰利品, 再坐地鐵去埋狸小路果邊買埋買手信.

早上係JR 站, 拎左 Peter Rabbit Cafe 既coupon,
所以順利成章去探下彼得彼得.
信步前往不遠既 Tokyu Hands

其實札幌市既商店分佈, 組合, 一切同大阪差唔多.
不過tokyu hand 就比較細, 無咩野買,
最後只係買左本相簿同一d 賀咭

Peter Rabbit Cafe 位於狸小路附近既一個mall,
雖然一早已經食左甜品buffet, 食得好飽
不過又唔好意思只係食個免費雪糕, 所以又叫左個橙味既cake,
免費雪糕要左芝麻味, 不過奶味遠超過芝麻, 麻麻地好食
我本身唔愛甜食, 今日一如之前既蝦蟹合戰一樣,
一日之內, 食左我30年既甜食總和
有幫趁, 自然可以放肆影相~

食完, 係個mall 度行左一陣,
轉番出大街, 見到國一堂拉麵,
我本人係好喜歡食拉麵既, 不過太太就麻麻地
由於係札榥時日無多, 要佢花一餐正餐去食拉麵,
實在委屈左佢, 我見機不可失,
唔理有幾飽, 又走入去食左一碗!
叫左一個叉燒麵同一個餃子.
麵有咬勁, 都幾好食, 由其是個湯, 飲晒.
不過後來先知原來國一堂係酒店附近都有一間分店......

食完野, 就到我要去搵漫畫玩具店Animate,
呢間Animate 係 Parco 附近, 不大好找.
而且係二樓, 好細間, 無咩玩具賣,
反而樓上樓下有好幾間大既漫畫店
不過都係以同人/同性漫畫居多, 我無咩特殊癖好,
最後只係買左一隻個樣好似我太太既pinky 就離開左.

時近旁晚, 終於跑到狸小路買手信.
其實都係六花亭之流, 白之戀人呢D 行貨就一定唔買啦~
除左手信, 太太少不免就去藥房睇下化妝品,
由於有帶walkie talkie, 我就不陪太太, 獨自在狸小路前後徘徊,
兼且幫前秘書買日本本土既俄羅納瑛雪花膏, 據講成份唔同云云.

一個人來回走勻狸小路,
原來狸小路盡頭處就係二條市場.
買到一手都係野, 而且飽得好緊要,
無食晚飯就搭地鐵番去,
係地鑼站出口既地下街,
老婆都唔放過機會, 大手買入好多耳環~
出左地面, 就順手去Yodobashi 買左個睇Slide 用既 Loupe,
以及幾pack Pivi 既即影即有 film 番酒店玩.